२०८१ कार्तिक २०, मंगलवार ०७:४४
जुवा खेलिरहेको अवस्थामा धनुषा प्रहरीले छापामारी ३९ जनालाई पक्राउ गरेको छ । धनुषाको क्षीरेश्वरनाथ नगरपालिकाको सखुवा बजारस्थित धर्मशालामा जुवा खेलिरहेका ३९ जनालाई जिल्ला प्रहरी कार्यालय धनुषाले पक्राउ गरेको जनाएको छ ।
क्षीरेश्वरनाथ नगरपालिका वडा नम्बर ६ स्थित धर्मशालाको पहिलो तल्लामा जुवा खेलाइने गरिएको थियो । पक्राउ पर्नेमा जुवा खेलाउने किशोरी साहलगायत जुवा खेल्न रौतहटबाट नियमित आउने गरेका जबिरा शाह, उदयपुरका रामरतन कापड, धनुषाका वंशराज नदाफ, बिलटु राइन मिया लगायत ३९ जना रहेको धनुषा प्रहरीले जनाएको छ ।
धनुषा प्रहरीका प्रहरी नायब उपरीक्षक वरुणबहादुर सिंहले जुवाखालबाट ९ लाख ७३ हजार ८ सय ७३ रुपैयाँ नगद बरामद भएको पुष्टि गरेका छन् । जुवा खेलाउन प्रयोग गरिने कौडा र तास समेत बरामद भएको छ । उनका अनुसार जुवाखालबाट २ गड्डी तास, फलवार प्रिन्ट भएको तास ३ थान, २४ पिस कौडा, सानो ठूलो ३६ थान मोबाइल बरामद भएको उनले बताए ।
यता जुवाडेको आरोपमा पक्राउ परेकाहरुमाथि मंगलबार धनुषा जिल्ला अदालतमा पेश गरिने धनुषा प्रहरीले जनाएको छ । उनीहरुमाथि जुवा तास अवैध रुपमा खोलाएको र खेलेको आरोपमा मुद्दा दायर गरी म्याद थप गरी थप अनुसन्धान गरिने धनुषा प्रहरीले जनाएको छ ।
